สติปุณฺณิยมูเลน , โจรสมเณน ปญฺจมํ;

ยโส ปตฺตปฺปสาเทน, ปฏิสารณียญฺจ วตฺตนนฺติฯ

(10) 5. สามญฺญวคฺโค

[91-116] อถ โข [เอตฺถ ‘‘อถ โข’’ติ จ, ‘‘อุปาสิกา’’ติ จ อิทํ อฏฺฐกถายเมว ทิสฺสติ, น ปาฬิโปตฺถเกสุ] โพชฺฌา [โพชฺฌงฺคา (ก. สี.)] อุปาสิกา [เอตฺถ ‘‘อถ โข’’ติ จ, อุปาสิกา’’ติ จ อิทํ อฏฺฐกถายเมว ทิสฺสติ, น ปาฬิโปตฺถเกสุ], สิรีมา, ปทุมา, สุตนา [สุธนา (สี. ปี.), สุธมฺมา (สฺยา.)], มนุชา, อุตฺตรา, มุตฺตา, เขมา, รุจี [รูปี (สี. ปี.)], จุนฺที, พิมฺพี, สุมนา, มลฺลิกา , ติสฺสา, ติสฺสมาตา [ติสฺสาย มาตา (สี. ปี.)], โสณา, โสณาย มาตา [โสณมาตา (สฺยา.)], กาณา, กาณมาตา [กาณาย มาตา (สี. ปี.)], อุตฺตรา นนฺทมาตา, วิสาขา มิคารมาตา, ขุชฺชุตฺตรา อุปาสิกา, สามาวตี อุปาสิกา, สุปฺปวาสา โกลิยธีตา [โกฬิยธีตา (สฺยา. ปี.)], สุปฺปิยา อุปาสิกา, นกุลมาตา คหปตานีฯ

สามญฺญวคฺโค ปญฺจโมฯ

ทุติยปณฺณาสกํ สมตฺตํฯ

(11). ราคเปยฺยาลํ

[117] ‘‘ราคสฺส , ภิกฺขเว, อภิญฺญาย อฏฺฐ ธมฺมา ภาเวตพฺพาฯ กตเม อฏฺฐ? สมฺมาทิฏฺฐิ, สมฺมาสงฺกปฺโป, สมฺมาวาจา, สมฺมากมฺมนฺโต, สมฺมาอาชีโว, สมฺมาวายาโม, สมฺมาสติ, สมฺมาสมาธิ – ราคสฺส, ภิกฺขเว, อภิญฺญาย อิเม อฏฺฐ ธมฺมา ภาเวตพฺพา’’ติฯ

[118] ‘‘ราคสฺส, ภิกฺขเว, อภิญฺญาย อฏฺฐ ธมฺมา ภาเวตพฺพาฯ กตเม อฏฺฐ? อชฺฌตฺตํ รูปสญฺญี พหิทฺธา รูปานิ ปสฺสติ ปริตฺตานิ สุวณฺณทุพฺพณฺณานิ, ตานิ อภิภุยฺย ‘ชานามิ ปสฺสามี’ติ เอวํสญฺญี โหติฯ อชฺฌตฺตํ รูปสญฺญี พหิทฺธา รูปานิ ปสฺสติ อปฺปมาณานิ สุวณฺณทุพฺพณฺณานิ, ตานิ อภิภุยฺย ‘ชานามิ ปสฺสามี’ติ เอวํสญฺญี โหติฯ อชฺฌตฺตํ อรูปสญฺญี พหิทฺธา รูปานิ ปสฺสติ ปริตฺตานิ สุวณฺณทุพฺพณฺณานิ, ตานิ อภิภุยฺย ‘ชานามิ ปสฺสามี’ติ เอวํสญฺญี โหติฯ อชฺฌตฺตํ อรูปสญฺญี พหิทฺธา รูปานิ ปสฺสติ อปฺปมาณานิ สุวณฺณทุพฺพณฺณานิ, ตานิ อภิภุยฺย ‘ชานามิ ปสฺสามี’ติ เอวํสญฺญี โหติฯ อชฺฌตฺตํ อรูปสญฺญี พหิทฺธา รูปานิ ปสฺสติ นีลานิ นีลวณฺณานิ นีลนิทสฺสนานิ นีลนิภาสานิ ปีตานิ ปีตวณฺณานิ…เป.… โลหิตกานิ โลหิตกวณฺณานิ…เป.… โอทาตานิ โอทาตวณฺณานิ…เป.… โอทาตนิภาสานิ, ตานิ อภิภุยฺย ‘ชานามิ ปสฺสามี’ติ เอวํสญฺญี โหติ – ราคสฺส, ภิกฺขเว, อภิญฺญาย อิเม อฏฺฐ ธมฺมา ภาเวตพฺพา’’ฯ

[119] ‘‘ราคสฺส, ภิกฺขเว, อภิญฺญาย อฏฺฐ ธมฺมา ภาเวตพฺพาฯ กตเม อฏฺฐ? รูปี รูปานิ ปสฺสติ, อชฺฌตฺตํ อรูปสญฺญี พหิทฺธา รูปานิ ปสฺสติ, สุภนฺเตว อธิมุตฺโต โหติ, สพฺพโส รูปสญฺญานํ สมติกฺกมา ปฏิฆสญฺญานํ อตฺถงฺคมา นานตฺตสญฺญานํ อมนสิการา ‘อนนฺโต อากาโส’ติ อากาสานญฺจายตนํ อุปสมฺปชฺช วิหรติ, สพฺพโส อากาสานญฺจายตนํ สมติกฺกมฺม ‘อนนฺตํ วิญฺญาณ’นฺติ วิญฺญาณญฺจายตนํ อุปสมฺปชฺช วิหรติ, สพฺพโส วิญฺญาณญฺจายตนํ สมติกฺกมฺม ‘นตฺถิ กิญฺจี’ติ อากิญฺจญฺญายตนํ อุปสมฺปชฺช วิหรติ, สพฺพโส อากิญฺจญฺญายตนํ สมติกฺกมฺม เนวสญฺญานาสญฺญายตนํ อุปสมฺปชฺช วิหรติ, สพฺพโส เนวสญฺญานาสญฺญายตนํ สมติกฺกมฺม สญฺญาเวทยิตนิโรธํ อุปสมฺปชฺช วิหรติ – ราคสฺส, ภิกฺขเว, อภิญฺญาย อิเม อฏฺฐ ธมฺมา ภาเวตพฺพา’’ฯ